卡域克去阿仙奴？

卡域克，現在球隊的助教，球員時代效力曼聯11年，仲有一年擔任過隊長。不過，效力曼聯之前佢曾經有機會加盟阿仙奴。但係，一個人的出現，就改變了卡域克和曼聯的命運。

2004年夏天，當時有前韋斯咸隊列納帶領既樸茨茅夫想邀請卡域克加盟，佢哋已經約好左係在一間酒店見面。而係前往酒店的路上，他的經理人收到阿仙奴一個電話，講明領隊雲加想見佢。因為當時阿仙奴既隊長韋拉剛剛離隊，雲加需要一位中場去 replace 佢。結果，卡域克去到雲加屋企同佢見面。

雲加當時以面試的方式問卡域克：「 Michael，同我講關於你既事？你既強項係乜？你既弱項又係乜？」結果佢地傾左一個小時，雲加邀請他係星期日入場睇慈善盾的賽事，然後係下個禮拜一再傾傾加盟的事。

事實上，在比賽之前，卡域克的經理人已經和阿仙奴傾好轉會費，他已經幻想代表阿仙奴踢歐聯既比賽。不過，當場代替韋拉踢慈善盾的法比加斯表現出色，令雲加改變主意，不久，經理人就收到阿仙奴既電話，話交易要取消了！

後來卡域克收到熱刺既邀請，之後就加盟了這支倫敦球會。係熱刺有2年既好表現，令佢係2007年得到費格遜既邀請加盟。

舉起獎杯的故事

2008年曼聯奪得英超聯賽同歐聯雙冠軍，當年隊長加利仔因為受傷要長期休養，不能擔任場上隊長的職責，這段時間，李奧費迪南擔任場上隊長。

2008年5月11日，曼聯作客擊敗韋根，確定奪得英超冠軍，並當場舉行頒獎典禮。正當李奧費迪南以為自己可以以隊長身分捧杯的時候，費格遜走來同佢講：「陣間你可唔可以比傑斯捧杯？」當時李奧心諗「傑斯已經捧過好多次囉」雖然心裡多麼的不情願，因為呢一刻自己已經等得太久了，但佢都答應了費格遜的要求。

雖然後來曼聯係 2009，2011同2013年再次奪得英超冠軍，但捧起獎杯的分別是加利仔，維迪同費格遜；李奧就與捧杯絕緣了。

後來係李奧費迪南既紀念賽裡面，傑斯親自同佢道謝，感激佢既成人之美，這句道謝，也減輕了李奧的遺憾感。

然後到2008年5月21日，曼聯係歐聯決賽擊敗車路士，正當球員瘋狂慶祝的時候，球隊秘書問隊長李奧，可唔可以同傑斯一齊捧起獎杯，這次太過興奮的李奧一D 都唔介意，仲話只要摸到個獎杯已經好開心了。而這次亦成為李奧費迪南唯一一次以隊長身分捧起獎杯的場面。

#alexferguson #manchesterunited #manutd #ryangiggs #giggs #rioferdinand #premierleague #championsleague #費格遜 #曼聯 #李奧費迪南 #英超 #傑斯 #歐聯 #歐聯決賽 

費格遜的初戀

費格遜成為曼聯領隊之後，就一直視利物浦為假想敵。但係你估都估唔到，費格遜的初戀係跟利物浦有關的。

費格遜的初戀女朋友是 Doreen Carling，當時費格遜18歲，而佢哋拍拖一年半左右，最後因為女方要去美國而分手。後來 Doreen 係美國結婚生仔。而佢其中一個孫仔，就係宜家利物浦右閘亞歷山大阿諾。

其實，亞歷山大阿諾的叔叔 John Alexander 一直是曼聯球會的秘書，並且效力多年。所以費格遜都問過亞歷山大阿諾：「點解你唔加盟曼聯？」

而出生於利物浦市的亞歷山大阿諾後來回答：「因為我媽媽唔識揸車阿！」

唔知費格遜係咪回應：「Bloody Hell！」 

戰死沙場的領隊 - Jock Stein

1985年9 月10日，威爾斯卡迪夫城，一場世界杯外圍賽，由蘇格蘭作客對威爾斯。蘇格蘭只有取勝先可以晉級1986年墨西哥世界杯決賽周。當時他們的領隊是史甸 (Jock Stein)，而他的助手是費格遜。

當時的史甸，是蘇格蘭球壇響當當的人物，球會方面他帶領些路迪在1967年歐冠決賽打敗國際米蘭，成為第一支英國球會贏得此項賽事。地位就有如今日既費格遜。

另外史甸亦很照顧同鄉，他可以說是費格遜做領隊的 mentor，很多時候費格遜都會請教史甸，包括係 1983年歐洲杯賽冠軍杯決賽對皇家馬德里之前，史甸就告訴費格遜要為對方領隊迪史提芬奴買一支靚既蘇格蘭Whisky，以放低自己的身分，將壓力交予對方。結果費格遜帶領鴨巴甸爆冷係加時打敗皇馬2：1，為鴨巴甸第一次贏得歐洲比賽冠軍。

史甸在1984年力主讓費格遜擔任他國家隊的助手，這亦成全了一個傳承的故事。

說回比賽。賽事進行的時候，費格遜已經覺得史甸有D唔妥，當日係酒店史甸就已經要食藥，而費格遜以為佢只係患左普通感冒而已。到比賽時，史甸已經面青口唇白；雖然比賽是蘇格蘭以1：1迫和威爾斯，晉身下一圈，但比賽未結束，史甸就已經同對方領隊Mike England 握手，然後史甸就由其他人抬佢返入更衣室，最後心臟病離開人世。蘇格蘭的世界杯旅程，就由助手費格遜帶領下繼續走下去。

費格遜坐正之後，不負所托，帶領蘇格蘭係附加賽擊敗澳洲晉身墨西哥決賽周，總算完成了史甸對國家的任務。 

兩個門將的友誼

一場足總盃決賽重賽，費格遜既一個決定，就改變了兩位門將的命運。咁呢兩位門將的關係又變得如何呢？

可能你會以為，施利咁樣搶左佢既正選位置，佢地兩個一定水火不融，但剛好相反，係呢場決賽之後，兩位門將仲保持住好好的關係，首先施利係贏得足總杯之後，就將冠軍金牌送比禮頓，不過禮頓還是尊重施利，偷偷地將個金牌放返入施利個衫袋裡。

就算佢地兩位分別離開曼聯 (施利係1991年夏天離開曼聯加盟阿士東維拉，禮頓係1992年夏天返回蘇格蘭加盟登地），但仍然保持住電話來往。而施利係2001年過身，其中一個幫佢抬棺木的就係禮頓。

費格遜的一個決定，決定了兩個門將的命運，但同事做就了一段友誼。Football, Bloody Hell! 

鄧肯愛華士與格連活

一個永遠無答案的問題：如果鄧肯愛華士唔係英年早逝，他可以有幾勁呢？他可以幫曼聯攞到幾多冠軍呢？

鄧肯愛華士，曼聯1950年代青訓產品的表表者，16歲開始代表曼聯對卡迪夫城，是當時英國頂級聯賽最年輕的出賽球員；18歲代表英格蘭國家隊，又係當時既紀錄；到1957年已經係金球獎第三名。他的天分，他的能力，隨着在1958年慕尼黑空難中離開人世，永遠為曼聯球迷帶來無限遐想。

我聽過三個故事，可以證明鄧肯愛華士有幾勁。

第一個故事：當年笠臣效力曼聯的時候，曾經問過當時的領隊艾堅遜：『老細，其實鄧肯愛華士有幾勁吖？』艾堅遜諗左一陣，然後輕描淡寫的回答：『有兩個你咁勁！』

第二個故事：據 Ben Thornley 既爸爸所講，係一場正式比賽裡面，鄧肯愛華士係禁區頂射門，個波中柱然後彈返出黎。你估彈到去邊度先落地？係彈到去中場!

第三個故事：卜比查爾頓爵士形容鄧肯愛華士：「他是唯一一個令我覺得自卑的球員。」

雖然我從來無睇過鄧肯愛華士踢波，但只係聽佢既故事就已經覺得佢係曼聯既傳奇。我宜家既希望，就放係格連活身上；一位同鄧肯愛華士一樣都係10月1日出生的年輕球員，希望鄧肯愛華士未能為曼聯做到的，格連活可以實現吧！

曼聯的友妻門

友妻門，即是搞你朋友老婆的事件。最出名既友妻門當然是車路士的泰利搞布烈治老婆的事件。但好不幸，曼聯也發生過友妻門事件。可能你會以為我想講傑斯，但傑斯係弟妻門，真正的友妻門主角係曼聯前教練杜察提 (Tommy Docherty)，也就是費格遜的前任的前任的前任。

杜察提系1972年12月擔任曼聯領隊，最大既功績就係帶領曼聯奪得1977年既英格蘭足總杯，當時係無人睇好既情況下打敗利物浦。但係之前既1974年，他卻帶曼聯降班，也是曼聯歷史上唯一降班的領隊。

根據 Martin Edwards 既自傳 《Red Glory》既記載，杜察提同球隊既物理治療師 Laurie Brown 既太太 Mary 搞埋一齊，杜察提為左同 Mrs Brown 有更多時間相處，仲特登調整 Laurie Brown 既返工時間，等佢地可以休會，以為可以將『世界陷進大騙局裡面，朋友亦難以發現。』

最後紙包唔住火，有報紙已經知道有關消息，準備大造文章。結果 Martin Edwards 為了 manage 呢件事對球隊既 risk，只好係1977 年7月以 misconduct 將佢炒魷。然後由戴夫昔士頓 (Dave Sexton) 取代佢既位置，而杜察提太太後來亦提出同佢離婚，帶住4個子女離開佢。

離婚後既杜察提同 Mary Brown 結婚，而自己亦去左打比郡繼續領隊生涯。

約基因何與費格遜決裂？

約基，曼聯三冠王的功臣之一，本來是費格遜力排眾議要收購的球員，但點解後來同費格遜約走越遠呢？

其中一個原因同私生活有關，因為佢同模特兒 Jordan 來往，生活漸變高調。這個只是伏線，而導火線是跟一次訓練有關。

話說2001年的一個星期一的早上，約基準備坐6:45 的飛機從愛爾蘭都柏林飛返曼徹斯特參加10點的訓練。不過飛機延誤只能係8:45 起飛，一到曼徹斯特機場，佢就即刻跳上的士去 Carrington，仲話比雙倍的士錢比個司機。

然後佢就打比負責球隊裝備既 Albert Morgan：「我係約基，我要遲少少先到，幫我準備好D波衫先！」

結果約基遲左5分鐘到達訓練場，佢就搵一夥樹後面換衫，然後當趁其他球員開始跑步到附近既時候就「鼠」入球員堆中，以為神不知鬼不覺。點知說時遲，佢就聽到費Sir 大嗌 “Yorkie, come here!” 

「除非你係真心獻身比球會，如果唔係呢度唔歡迎你，你走！唔駛參加訓練啦！」

雖然當時曼聯已經接近連續第三年攞到英超冠軍，但費格遜仍然以紀律為先，就算你係三冠王功臣都無情講。

舒利亞點解唔去曼聯？

1996 年夏天，舒利亞曾經無限接近加盟曼聯，但最後一刻佢選擇加盟紐卡素。最近佢透露了真正的原因。

1996的一天，舒利亞分別同費格遜和奇雲基謹見面。當佢同費格遜見面時提出一個要求：「我要主射12碼」。但當時費格遜回應：「但係我地已經有簡東拿啦。」

過幾日之後，奇雲基謹再打比舒利亞勸佢加盟，舒利亞最後決定返回老家，第二次拒絕加盟曼聯。

不過前曼聯主席 Martin Edwards 提供了另外一個原因。由於當時舒利亞效力布力般流浪，佢同布力般的主席 Jack Walker 情如父子。但 Jack Walker 一直唔鍾意曼聯，而舒利亞為左唔想令主席唔開心，所以就拒絕曼聯。

到底邊個先係真正的原因，只有舒利亞自己先知道。但一個重大的決定，可能係由好多小故事交錯編織而成。

#alexferguson #alanshearer #Newcastle #manchesterunited #manutd #martinedwards #費格遜 #奇雲基謹 #曼聯 #舒利亞 #紐卡素 #馬田愛華士

費格遜點簽舒米高？

舒米高，1991年以50萬5千轉會曼聯，被 Martin Edwards 喻為他管理下最好的收購。

當年費格遜是怎樣簽到舒米高的呢？在一個暑假，曼聯到西班牙集訓，剛好與丹麥球隊邦比共用同一間酒店和訓練設施。因此費格遜得以派他的龍門訓練員 Alan Hodgkinson 去近距離觀察舒米高。Alan 好快就匯報費 Sir，舒米高要適應英格蘭足球係完全無問題的。

曼聯曾經係1990年提出要求收購舒米高，但邦比的要價極高而未能成事。舒米高也因此深感失望，據他形容，那是他一生的一個低潮。後來有一日，他的經理人請舒米高到他的助理的家，竟發現費格遜在哪裡，原來費格遜當日早上坐飛機由曼徹斯特去哥本哈根，為的就是見舒米高一面，然後就坐飛機返曼徹斯特。

費格遜的一席話，令舒米高得以重新專注在訓練上，並知道曼聯和費格遜決心會得到自己。

後來曼聯知道舒米高和邦比的合同在1991年11月到期，所以曼聯就可以係8月，以50萬5千英鎊這個低價收購到這位丹麥門神，後來證明為曼聯史上一宗最佳收購。